ప్రత్యేక హోదాపై జగన్ హ్యాండ్సప్! తాకట్టు పెట్టేసినట్టేనా..? 

ప్రత్యేక హోదా ఆంధ్రప్రదేశ్ కు సంజీవని. స్పెషల్ స్టేటస్ ఏపీ హక్కు అని, విభజనతో నష్టపోయిన ఏపీకి ప్రత్యేక హోదాతోనే న్యాయం జరుగుతుందనేది ప్రజల భావన. విభజన చట్టంలోనూ దీన్ని పొందు పరిచారు. పార్లమెంట్ లో అప్పటి దేశ ప్రధానమంత్రి హామీ ఇచ్చారు. కాని విభజన జరిగి ఏడేండ్లు పూర్తైనా ప్రత్యేక హోదా హామీ మాత్రం నెరవేరలేదు. ఏపీతో కేంద్ర ప్రభుత్వాలు ఆటలాడుతున్నాయనే ఆగ్రహం ఏపీ ప్రజల నుంచి వ్యక్తమవుతోంది. గతంలో ప్రతిపక్ష నేతగా ఉన్న జగన్.. ప్రత్యేక హోదా కేంద్రంగానే రాజకీయం చేశారు. తమ పార్టీకి అధికారం ఇస్తే కేంద్రంతో పోరాడి రాష్ట్రానికి ప్రత్యేక హోదా సాధిస్తామని చెప్పారు. కాని ఆయన అధికారంలోకి వచ్చి రెండేండ్లు పూర్తైనా ప్రత్యేక హోదాపై మాత్రం అతిగతీ లేదు.  ప్రత్యేక హోదా సాధించడం కాదు..  కనీసం ఆ పదం కూడా సీఎం జగన్మోహన్ రెడ్డి పలకడం లేదనే విమర్శలు ఉన్నాయి. కేంద్రాన్ని నిలదీస్తానన్న జగన్... కేంద్రం ముందు హోదా ప్రస్తావన కూడా తేవడం లేదనే ఆరోపణలు వస్తున్నాయి. మడమ తిప్పేది లేదు.. మాట తప్పేది లేదు అని గొప్పగా చెప్పుకునే జగన్.. ప్రత్యేక హోదా విషయంలో మాత్రం మడమ తిప్పేశారని, కేంద్రానికి తాకట్టు పెట్టేశారనే విపక్షాలు ఆరోపిస్తున్నాయి. తనపై ఉన్న సీబీఐ, ఈడీ కేసుల కోసం ప్రత్యేక హోదా గురించి కేంద్రంతో రాజీ పడ్డారని మండిపడుతున్నాయి. వైసీపీ నేతలు మాత్రం ప్రత్యేక హోదా కోసం పోరాడుతూనే ఉన్నామని చెబుతున్నారు. అయితే తాజాగా సీఎం జగన్మోహన్ రెడ్డే ప్రత్యేక  హోదాపై చేతులెత్తేశారు. కేంద్రం దగ్గర చేసేదిమి లేదంటూ.. ప్రత్యేక హోదా ఇక రాదనే సంకేతమిచ్చారు.  2021-22కు సంబంధించి జాబ్ క్యాలెండర్ విడుదల చేసిన సందర్భంగా మాట్లాడిన సీఎం జగన్మోహన్ రెడ్డి.. ప్రత్యేక హోదాపై కీలక వ్యాఖ్యలు చేశారు. ప్రత్యేక హోదా కోసం ఢిల్లీ వెళ్లిన ప్రతిసారి కేంద్రాన్ని అడుగుతూనే ఉన్నామని చెప్పారు. అయితే ప్రస్తుతం ఢిల్లీలో సంకీర్ణ సర్కార్ లేదని, కేంద్రం దగ్గర చేసేదేమి లేదని తెలిపారు. ప్రత్యేక హోదా కోసం కేంద్ర ప్రభుత్వంపై ఒత్తిడి తేలేమంటూ.. తన వల్ల కాదని అంగీకరించారు జగన్. ప్రత్యేక హోదా కోసం కేంద్రంతో పోరాడుతానని చెప్పిన జగన్... ఇప్పుడు ఏం చేయలేమంటూ హ్యాండ్సప్ అనడంపై తీవ్ర విమర్శలు వస్తున్నాయి.  లోక్ సభలో వైసీపీకి 22 మంది ఎంపీలున్నారు. లోక్ సభలో నాలుగో అతిపెద్ద పార్టీగా ఉంది వైసీపీ. 22 మంది ఎంపీలున్నా కేంద్రంతో పోరాడలేమని సీఎం జగన్ చెప్పడంపై విపక్షాలు మండిపడుతున్నాయి. అసలు కేంద్రాన్ని అడగకుండా ఎలా సాధిస్తారని ప్రశ్నిస్తున్నారు. 22 మంది ఎంపీలు రాజీనామా చేస్తే కేంద్రంపై ఒత్తిడి పెరగదా అని కొందరు నిలదీస్తున్నారు. జగన్ వాలకం చూస్తుంటే ప్రత్యేక హోదా తమకు అక్కరలేదని కేంద్రానికి చెప్పినట్లుగా ఉందనే అభిప్రాయం కూడా కొన్ని  వర్గాల నుంచి వస్తోంది.  విపక్షాలు ఆరోపిస్తున్నట్లు తన కేసుల కోసం ప్రత్యేక హోదాను కేంద్రానికి జగన్మోహన్ రెడ్డి తాకట్టు పెట్టినట్లుగా ఉందని ఏపీ జనాలు అనుమానిస్తున్నారు. సంకీర్ణ సర్కార్ కాకున్నా కొన్ని రాష్ట్రాలు తమకు కావాల్సిన వాటిని సాధించుకుంటున్నాయని చెబుతున్నారు. తమిళనాడు ముఖ్యమంత్రి స్టాలిన్ ను చూసైనా జగన్ నేర్చుకోవాలని సూచిస్తున్నారు. వ్యక్తిగత ప్రయోజనాలు, కేసుల కోసం రాజీ పడి.. రాష్ట్రానికి జగన్ అన్యాయం చేస్తున్నారని మండిపడుతున్నారు.
Publish Date:Jun 18, 2021

ఏపీలో కర్ఫ్యూ మరింత సడలింపు.. ఆ జిల్లాలో పాత రూల్సే..

ఆంధ్రప్రదేశ్ లో  కర్ఫ్యూ వేళలను మరింత సడలించారు. పగలంతా కర్ఫ్యూ ఎత్తేశారు. కొవిడ్ పై సీఎం జగన్ అధ్యక్షతన జరిగిన సమీక్షా సమావేశంలో ఈ మేరకు నిర్ణయం తీసుకున్నారు. ఇప్పటివరకు ఏపీలో ఉదయం ఆరు గంటల నుంచి మధ్యాహ్నం 2 గంటలకు వరకు సడలింపు ఉండగా.. ఇకపై ఉదయం 6గంటల నుంచి సాయంత్రం 6 గంటల వరకూ సడలింపు ఇవ్వాలని కర్ఫ్యూ సీఎం జగన్ నిర్ణయించారు. జూన్‌ 20 నుంచి 30 వరకూ ఈ ఆంక్షలు అమల్లో ఉంటాయి. సాయంత్రం 5 గంటల కల్లా దుకాణాలు మూసివేయాల్సి ఉంటుంది. సాయంత్రం 6 గంటల నుంచి కర్ఫ్యూ కచ్చితంగా అమలవుతుంది.  తూర్పు గోదావరి జిల్లాలో మాత్రం పాత రూల్సే అమలు చేయనున్నారు. ఉదయం 6 గంటల నుంచి మధ్యాహ్నం 2 గంటల వరకూ మాత్రమే సడలింపు వర్తించనుంది. కొవిడ్‌ పాజిటివిటీ రేటు ఎక్కువగా ఉన్నందున ఈ జిల్లాలో ఉదయం 6 నుంచి మధ్యాహ్నం 2 గంటల వరకూ మాత్రమే సడలింపు ఇవ్వాలని సీఎం నిర్ణయించారు. ప్రభుత్వ కార్యాలయాలన్నీ రెగ్యులర్‌ టైమింగ్స్‌ ప్రకారం నడవనున్నాయి. ఉద్యోగులు అందరూ కార్యాలయాలకు వచ్చేలా మార్పులు చేస్తున్నారు.  ఏపీలో కొవిడ్ కేసులు క్రమంగా తగ్గుతున్నాయి. గతంలో రోజుకు 20 వేలకు పైగా కేసులు నమోదవగా.. ప్రస్తుతం 6 వేలకు పైగా కేసులు వస్తున్నాయి. 
Publish Date:Jun 18, 2021

బీ కేర్‌ఫుల్‌.. వ‌దిలిపెట్టం.. వేటాడ‌తాం.. లోకేశ్ స్ట్రాంగ్ వార్నింగ్‌..

మేము సింహం లాంటి వాళ్లం.. అరాచ‌కాల‌కు భ‌య‌ప‌డి పారిపోయే వాళ్లం కాదు.. మిమ్మల్ని వదిలిపెట్టం.. వేటాడతాం.. మా ఓపిక‌ను ప‌రీక్షించొద్దు.. స‌మ‌యం వ‌స్తుందు.. నేనే గుణ‌పాఠం చెబుతా.. అంటూ ఓ రేంజ్‌లో ఫైర్ అయ్యారు టీడీపీ జాతీయ కార్య‌ద‌ర్శి నారా లోకేశ్‌. వైసీపీ అధికారంలోకి వచ్చాక ఏపీలో 27 మంది టీడీపీ కార్యకర్తలను దారుణంగా చంపారని మండిప‌డ్డారు. టీడీపీ కార్యకర్తలు, సానుభూతిపరులపై వరుస దాడులు జరుగుతున్నాయని.. ప్రజల ప‌క్షాన పోరాడుతున్న వారిపై దాడులు చేస్తారా? అని ప్రశ్నించారు.  కర్నూలు జిల్లా పెసరవాయిలో హత్యకు గురైన టీడీపీ నేతలు నాగేశ్వర్‌రెడ్డి, ప్రతాప్‌రెడ్డి కుటుంబాలను నారా లోకేశ్‌ పరామర్శించారు. ఘటనకు సంబంధించిన వివరాలను వారిని అడిగి తెలుసుకున్నారు. కుటుంబసభ్యులను కోల్పోయామని..  బాధిత కుటుంబాలకు పార్టీ అండగా ఉంటుందని.. అన్ని రకాలుగా ఆ కుటుంబాలను ఆదుకుంటామ‌ని.. నారా లోకేశ్‌ హామీ ఇచ్చారు.    ‘‘టీడీపీ కార్యకర్తలను బెదిరించి, నాయకులను చంపితే మేం వెనక్కి తగ్గుతామని అనుకుంటున్నారా? మిమ్మల్ని వదిలిపెట్టం. మా కార్యకర్తలను భయపెడితే పార్టీకి నష్టం తేవచ్చని మీరు అనుకుంటున్నారు. టీడీపీ ఎక్కడికీ పోదు. మేం మీకు భయపడి పారిపోయేవాళ్లం కాదు. ధైర్యంగా నిలబడి ప్రజల తరఫున పోరాడతాం. మా ఓపికను పరీక్షించొద్దు.. బీ కేర్‌ఫుల్‌. సమయం వస్తుంది.. అప్పుడు నేతలు, రాజారెడ్డి రాజ్యాంగం అమలు చేస్తున్న అధికారులకు గుణపాఠం చెప్పే బాధ్యతను నేను వ్యక్తిగతంగా తీసుకుంటానని టీడీపీ కార్యకర్తలకు హామీ ఇస్తున్నా’’ అని లోకేశ్‌ అన్నారు.   మంచి పని చేయాలంటే అభివృద్ధి చేయండి. రాయలసీమకు కొత్త పరిశ్రమలు తీసుకురండి. సాగునీటి ప్రాజెక్టులు పూర్తిచేయండి. అవి మీకు చేతకాకే మా కార్యకర్తలు, నేతలపై ఎదురుదాడి చేస్తున్నారని నారా లోకేశ్ మండిప‌డ్డారు.   క‌ర్నూలు జిల్లా పెస‌ర‌వాయికి చెందిన టీడీపీ నేత‌లు నాగేశ్వర్‌రెడ్డి, ప్రతాప్‌రెడ్డి గురువారం ఉదయం శ్మశానానికి వెళ్తుండ‌గా.. ప్ర‌త్య‌ర్థులు మాటు వేసి హ‌త‌మార్చారు. పక్కా ప్రణాళికతో కారుతో ఢీకొట్టి.. వేట కొడవళ్లు, గొడ్డళ్లతో నరికి వారిని దారుణంగా చంపేశారు. ఘ‌ట‌న‌లో మ‌రో ముగ్గురికి తీవ్ర గాయాల‌య్యాయి. వైసీపీ నాయ‌కులే ఈ హ‌త్య‌ల‌కు పాల్ప‌డ్డార‌ని తెలుస్తోంది. ఆ రెండు వ‌ర్గాల‌కు ఎప్ప‌టినుంచో గొడ‌వ‌లు ఉన్న‌ట్టు స‌మాచారం.
Publish Date:Jun 18, 2021

11 నుంచి 26 శాతానికి పెరిగిన వ్యతిరేకత! అయినా మోడీనే ప్రపంచ టాప్ లీడర్.. 

భారత ప్రధానమంత్రి నరేంద్ర మోడీ హవా తగ్గిందా? కొంత కాలంగా ఆయన ఇమేజ్ తగ్గుతూ వస్తోందా? వచ్చే ఎన్నికల్లో ఆయనను తప్పించాలని కాషాయ దళం భావిస్తుందా? ఇదే చర్చ కొన్ని రోజులుగా దేశ రాజకీయాల్లో కీలకంగా మారింది. ప్రధాని మోడీపై జనాల్లో తీవ్ర వ్యతిరేకత ఉందనే ప్రచారం జరుగుతోంది. తాజా పరిణామాలపై బీజేపీలో టెన్షన్ పెరుగుతుందని కూడా వార్తలు వచ్చాయి. నిజానికి భారత ప్రధానమంత్రి నరేంద్ర మోడీ..  ప్రపంచంలోనే పాపులారిటీలో టాప్ లీడర్. గతంలో పలు జాతీయ, అంతర్జాతీయ సంస్థలు నిర్వహించిన సర్వేలో ఆయనకే మొదటి స్థానం దక్కింది. సోషల్ మీడియాలోనూ ఎక్కువ మంది ఫాలోవర్లు ఉన్న లీడర్ గా మోడీనే నిలిచారు. ఈ విషయంలో అమెరికా ప్రెసిడెంట్ ను కూడా వెనక్కి నెట్టారు నరేంద్ర మోడీ. అయితే కొవిడ్ సెకండ్ వేవ్ తర్వాత.. భారత ప్రధాని క్రేజీ తగ్గిందనే వార్తలు వచ్చాయి. కరోనా కట్టడిలో మోడీ ప్రభుత్వం విఫలమైందంటూ అంతర్జాతీయ మీడియాలో భారీగా కథనాలు వచ్చాయి. దేశంలో మోడీపై గతంలో ఎప్పుడు లేనంత వ్యతిరేకత కనిపిస్తోంది.  నరేంద్ర మోడీ క్రేజీ తగ్గిందనే వార్తలతో కలవరపడుతున్న కమలనాధులకు ఊరటనిచ్చే న్యూస్ వచ్చింది. ప్రపంచంలో ఎక్కువ పాపులారిటీ  ఉన్న నేతల్లో భారత ప్రధాని నరేంద్ర మోడీనే మరోసారి టాప్ ప్లేస్ లో నిలిచారు. పలు దేశాల అధినేతలకన్నా ముందు నిలిచారు. 'మార్నింగ్ కన్సల్ట్’ అనే సంస్థ చేసిన సర్వేలో 66 శాతం మంది ప్రధాని నరేంద్ర మోడీనే మళ్లీ దేశాధినేతగా కావాలని కోరుకుంటున్నారట. ‘గ్లోబల్ లీడర్ అప్రూవల్ రేటింగ్ ట్రాకర్’ పేరిట ఆ సర్వే ఫలితాలను మార్నింగ్ కన్సల్ట్ వెల్లడించింది. ఈ లిస్టులో అగ్రరాజ్యం అమెరికా అధ్యక్షుడు జో బైడెన్ సహా 13 అగ్రదేశాధినేతల కన్నా ప్రధాని మోడీకే ఎక్కువ మంది జై కొట్టారు.  భారత్ లో 2,126 మందిని సర్వే చేస్తే అందులో 66 శాతం మంది.. ప్రధాని మోడీకి ఓటేశారు. మరో 28 శాతం మంది వ్యతిరేకత వ్యక్తం చేశారు. అయితే గతంతో పోలిస్తే మోడీ స్కోర్ పడిపోయింది. జమ్మూకశ్మీర్ కు స్వతంత్ర ప్రతిపత్తి హోదా కల్పించే 370 అధికరణాన్ని రద్దు చేసిన ఆగస్టు 2019లోమోడీని దేశంలో  82 శాతం మంది ఆమోదించారని, కాని ఇప్పుడది 65 శాతంగానే ఉందని మార్నింగ్ కన్సల్ట్ సంస్థ వెల్లడించింది. 2019లో మోడీని కేవలం 11 శాతం మందే వ్యతిరేకించగా.. ప్రస్తుతం అది 26 శాతానికి పెరిగింది. ఇదే బీజేపీలో కొంత ఆందోళన రేపుతోంది.  65 శాతం మంది ఆమోదంతో మోడీ తర్వాతి స్థానంలో ఇటలీ ప్రధాని మారియో ద్రాఘీ ఉన్నారు. మూడో స్థానంలో మెక్సికో అధ్యక్షుడు ఆండ్రూస్ మాన్యుయెల్ లోపెజ్ ఓబ్రడార్ (63%) ఉన్నారు.  అమెరికా అధ్యక్షుడు జో బైడెన్ ఆరో స్థానంలో నిలిచారు. ఆయనకు  53 శాతం మంది అమెరికన్లు మద్దతుగా నిలిచారు. ఆ తర్వాతి స్థానాల్లో వరుసగా ఆస్ట్రేలియా ప్రధాని స్కాట్ మోరిసన్ (54%), జర్మనీ చాన్స్ లర్ ఏంజెలా మెర్కెల్ (53%), కెనడా ప్రధాని జస్టిస్ ట్రూడూ (48%), బ్రిటన్ ప్రధాని బోరిస్ జాన్సన్ (44%), దక్షిణ కొరియా అధ్యక్షుడు మూన్ జే ఇన్ (37%), స్పెయిన్ ప్రధాని పెడ్రో సాంచెజ్ (36%), బ్రెజిల్ అధ్యక్షుడు జైర్ బోల్సోనారో (35%), ఫ్రాన్స్ అధ్యక్షుడు ఇమ్మాన్యుయెల్ మేక్రాన్ (35%), జపాన్ ప్రధాని యోషిహిదే సూగా (29%) ఉన్నారు. వారం రోజుల సగటు ఆధారంగా ఈ సర్వే ఫలితాలను వెల్లడించినట్టు మార్నింగ్ కన్సల్ట్ పేర్కొంది. సర్వేను ఆన్ లైన్ లో చేసినట్టు తెలిపింది. 
Publish Date:Jun 18, 2021

ఈట‌ల‌నే సీఎం కేండిడేట్‌? త్వ‌ర‌లోనే తెలంగాణ టూర్‌..

హుజురాబాద్ బైపోల్‌ 2023 అసెంబ్లీ ఎల‌క్ష‌న్స్‌కు రిహార్స‌ల్స్‌. హుజురాబాద్ ఎన్నికల త‌ర్వాత తెలంగాణ వ్యాప్తంగా ప‌ర్య‌టించి బీజేపీని బ‌లోపేతం చేస్తా. కేసీఆర్ అహంకారానికి ప్ర‌జ‌లే ఘోరీ క‌డ‌తారు. ఇవీ కాషాయ కండువా క‌ప్పుకున్నాక తొలిసారి హుజురాబాద్ వ‌చ్చిన ఈట‌ల నోటి నుంచి వ‌చ్చిన మాట‌లు. గ‌తవారం హుజురాబాద్ నుంచి వెళ్లేట‌ప్పుడు గుప్పెడు అనుచ‌రుల‌తో వెళ్లారు. బీజేపీలో చేరి తిరుగొచ్చేట‌ప్పుడు కాషాయ దండుతో క‌దిలొచ్చారు. ఈట‌ల వెనుక జ‌న ప్ర‌భంజ‌నం. ప‌దుల సంఖ్య‌లో కార్లు, వంద‌ల సంఖ్య‌లో బైకులు.. వేలాదిగా యువ‌కులు.. ఇప్పుడు ఈట‌ల ఓ వ్య‌క్తి కాదు.. కాషాయ శ‌క్తి.. కేసీఆర్‌పై పోరాడే యుక్తి. ఈట‌ల హుజురాబాద్ ప‌ర్య‌ట‌న అనేక అంశాల్లో క్లారిటీ ఇచ్చేస్తోంది. రాజేంద‌ర్ వెంటే బీజేపీ నేత‌ల పెద్ద ఎత్తున త‌ర‌లివ‌చ్చారు. ఎమ్మెల్యే ర‌ఘునంద‌న్‌రావు, మండ‌లి మాజీఛైర్మ‌న్ స్వామిగౌడ్‌, బీజేపీ కోర్‌ కమిటీ సభ్యుడు వివేక్‌, మాజీ ఎమ్మెల్యే ఏనుగు రవీందర్‌రెడ్డి.. ఇలా పెద్ద పెద్ద నేత‌లే ఈట‌ల వెంట ఉన్నారు. రేపేమాపో బీజేపీ రాష్ట్ర అధ్య‌క్షులు బండి సంజ‌య్ సైతం హుజురాబాద్‌లో ప‌ర్య‌టించ‌నున్నారు.  వ‌చ్చిన జ‌నాన్ని, ల‌భించిన స్వాగ‌తాన్ని చూస్తే.. హుజురాబాద్‌లో ఈట‌ల స‌త్తా ఎంతో తేలిపోతుంది. ఆయ‌న ప‌ట్టు ఏమాత్రం స‌డ‌ల‌లేద‌ని తెలుస్తోంది. అధికార‌పార్టీ ఎంత‌గా బెదిరింపుల‌కు పాల్ప‌డినా.. జ‌నం జ‌న‌నేత వెంటే ఉన్నార‌ని అర్థ‌మ‌వుతోంది. ఇదే ఇప్పుడు గులాబీ శిబిరంలో గుబులు రేపుతోంది. అభివృద్ధి ప‌నుల పేరుతో ఇప్ప‌టికే హుజురాబాద్‌లో 30 కోట్లు కుమ్మ‌రించినా.. ప్ర‌జ‌లకు క‌ళ్లెం వేయ‌లేక‌పోయారు. ఆర్థికంగా బాగా బ‌ల‌మున్న‌ ఈట‌ల సైతం అదే స్థాయిలో ఖ‌ర్చు చేస్తుండ‌టంతో పోటీ హోరాహోరీగా సాగుతోంది. టీఆర్ఎస్ కోసం ఇప్ప‌టికే మంత్రులు, ఎమ్మెల్యేలు, ఎమ్మెల్సీలు రంగంలోకి దిగి.. మండ‌లాల వారీగా బాధ్య‌త‌లు మీదేసుకుని ప‌ని చేసుకుపోతున్నారు. సొంత ఇలాఖాలో ఈట‌ల సింగిల్ హ్యాండ్‌గా న‌రుక్కొస్తున్నారు. భార్య జ‌మునారెడ్డి ఓవైపు, ఈట‌ల మ‌రోవైపు.. వారికి అండ‌గా అనుచ‌రులు, క‌మ‌ల‌నాథులు మోహ‌రించి కురుక్షేత్ర సంగ్రామానికి న‌గారా మోగించేశారు.  జ‌స్ట్‌.. హుజురాబాద్‌తోనే ఆగేలా లేరు ఈట‌ల రాజేంద‌ర్‌. ఇదే ఊపుతో 2023లో కేసీఆర్‌ను గ‌ద్దె దించే వ‌ర‌కూ విశ్ర‌మించేది లేదంటున్నారు. ఇది అసెంబ్లీ పోరుకు రిహార్స‌ల్స్ అంటూ త్వ‌ర‌లోనే తెలంగాణ వ్యాప్తంగా ప‌ర్య‌టిస్తానంటూ తొడ‌గొట్టారు ఈట‌ల రాజేంద‌ర్‌. ఆయ‌న మాట‌ల్లో అనేక మీనింగ్స్ తీస్తున్నారు విశ్లేష‌కులు. ఈట‌ల ఇప్పుడు స్వ‌తంత్రుడు కాదు. బీజేపీ స‌భ్యులు. ఓ పార్టీలో ఉన్న‌ప్పుడు పార్టీ లైన్ ప్ర‌కార‌మే న‌డుచుకోవాలి.. పార్టీ ఆదేశాల మేర‌కే ప‌ని చేయాలి.. పార్టీ అప్ప‌గించిన బాధ్య‌త‌ల‌ను మాత్ర‌మే నెర‌వేర్చాలి.. సొంతంగా నిర్ణ‌యాలు తీసుకునేందుకు లేదు.. ఈట‌ల‌కు ఆ విష‌యం తెలియందీ కాదు.  మ‌రి, త్వ‌ర‌లోనే తాను తెలంగాణ వ్యాప్తంగా ప‌ర్య‌టించి బీజేపీని బ‌లోపేతం చేస్తాన‌నే మాట‌ల వెనుక మ‌ర్మ‌మేంట‌ని ఆరా తీస్తున్నారు.  ఇప్ప‌టికే ఢిల్లీ పెద్ద‌ల‌తో సుదీర్ఘంగా మంత‌నాలు జ‌రిపిన ఈట‌ల‌కు ఆ మేర‌కు బీజేపీ అగ్ర నాయ‌క‌త్వం నుంచి ఆదేశాలు అందాయా? అంటున్నారు. బీజేపీ హైక‌మాండ్ ఇషారాతోనే తెలంగాణ వ్యాప్తంగా ప‌ర్య‌ట‌న‌కు ఏర్పాట్లు చేసుకుంటున్నారా? అని అనుమానిస్తున్నారు. ఈట‌ల‌ను కేవ‌లం హుజురాబాద్ నేత‌గానే కాకుండా రాష్ట్ర స్థాయి లీడ‌ర్‌గా ప్ర‌మోష‌న్ ఇచ్చేసిన‌ట్టేనా? అంటే, బీజేపీ రాష్ట్ర అధ్య‌క్షులు బండి సంజ‌య్‌తో స‌మాన స్థాయిని ఈట‌ల‌కు క‌ల్పించారా? 2023 అసెంబ్లీ ఎన్నిక‌ల‌కు ఇది రిహార్స‌ల్స్ అన్నారంటే.. ఆ అసెంబ్లీ సంగ్రామం సైతం ఈట‌ల నేతృత్వంలోనే సాగుతుంద‌ని సంకేతమా? ఆ లెక్క‌న‌.. బీజేపీ త‌ర‌ఫున ముఖ్య‌మంత్రి అభ్య‌ర్థి కూడా ఈట‌ల రాజేంద‌రేనా? అనే చ‌ర్చ రాజ‌కీయ వ‌ర్గాల్లో జ‌రుగుతోంది. బీజేపీ అధిష్టానం నుంచి వ‌చ్చిన హింట్‌తోనే ఈట‌ల అలాంటి వ్యాఖ్య‌లు చేశార‌ని.. రాబోయే కాలంలో క‌మ‌లం పార్టీకి కాబోయే కెప్టెన్ ఈట‌ల‌నే అంటున్నారు ఆయ‌న అనుచ‌రులు. అందుకే ఆ జోరు.. ఆ హుషారు..
Publish Date:Jun 18, 2021

కర్ణాటక టాప్.. యూపీ లాస్ట్! వ్యాక్సినేషన్ లో ఏపీ అంతంతే.. 

దేశంలో కొవిడ్ వ్యాక్సినేషన్ ప్రక్రియ ముమ్మరంగా సాగుతోంది. టీకాల కొరత ఉన్నా అందుబాటులో ఉన్నంతవరకు సాధ్యమైనంత వేగంగా టీకాల పంపిణికి రాష్ట్రాలకు చర్యలు చేపట్టాయి. కేంద్ర ఆరోగ్య శాఖ లెక్కల ప్రకారం గురువారం వరకు దాదాపు 27 కోట్ల టీకాలు వేశారు. ఇందులో 21.58 కోట్ల మందిఒక్క డోస్ వ్యాక్సిన్ తీసుకున్నారు. అంటే మొత్తం జనాభాలో 15.74 శాతం మందికి వ్యాక్సిన్ వేసినట్లు లెక్క. కొన్ని రాష్ట్రాల్లో వేగంగా సాగుతుండగా.. ఇంకొన్ని రాష్ట్రాల్లో మాత్రం నెమ్మదిగా సాగుతోంది. జనాభా తక్కువగా ఉన్న చిన్న రాష్ట్రాల్లో స్పీడుగా టీకాల పంపిణి సాగుతుండగా.. పెద్ద రాష్ట్రాలు మాత్రం వెనకబడ్డాయి.  వ్యాక్సినేషన్ రేటు ఎక్కువగా ఉన్న రాష్ట్రాల జాబితాలో గోవా టాప్ ప్లేస్‌లో ఉంది. గోవాలో గురువారంఉదయం వరకు... ఆ రాష్ట్ర జనాభాలో 37.35శాతం మందికి కనీసం మొదటి డోసు వేశారు.  గోవా తర్వాతి స్థానాల్లో సిక్కిం (37.29%), హిమాచల్ ప్రదేశ్ (30.35), త్రిపుర (29.07), కేరళ (26.23), గుజరాత్ (25.69), ఢిల్లీ (25.39) ఉన్నాయి.  వ్యాక్సినేషన్‌లో యూపీ, బీహార్, అసోం, ఝార్ఖండ్, తమిళనాడు, పశ్చిమ బెంగాల్ రాష్ట్రాలు వెనకబడి ఉన్నాయి.  యూపీలో గురువారం వరకు కేవలం 8.53% మంది మాత్రమే టీకా వేసుకున్నారు. బీహార్‌లో 8.61, అసోంలో 11.26, ఝార్ఖండ్‌లో 11.64, తమిళనాడులో 12.10, పశ్చిమ బెంగాల్‌లో 14.16 శాతం మందికి వ్యాక్సిన్ వేశారు. వ్యాక్సినేషన్ లో  తెలుగు రాష్ట్రాల పరిస్థితి  అంతంత మాత్రంగానే ఉంది. తెలంగాణలో ఇప్పటి వరకు 19 శాతం మంది టీకా తీసుకోగా.. ఏపీలో 18శాతం మంది వ్యాక్సిన్ తీసుకున్నారు. పెద్ద రాష్ట్రాల్లో కర్నాటక మాత్రమే కాస్త మెరుగ్గా ఉంది. అక్కడ ఇప్పటి వరకు 22 శాతం మందికి టీకాలు వేశారు.  అయితే జాతీయ వ్యాక్సినేషన్ రేటు కంటే.. ఏపీ, తెలంగాణ వ్యాక్సిన్ రేటు ఎక్కువ ఉంది.   
Publish Date:Jun 18, 2021